फिल्मी फण्डा।  चलचित्र विकास बोर्डले आफ्नो स्थापनाको २५ औं वार्षिक उत्सव (रजत महोत्सव) को अवसरमा पछिल्लो २५ वर्ष (वि.सं. २०५७ असार १६ देखि २०८२ जेठ मसान्तसम्म) मा नेपालमा प्रदर्शन भएका स्वदेशी चलचित्रहरूमध्ये सर्वाधिक व्यापार गर्ने २५ चलचित्रका निर्मातालाई सम्मान गर्ने भएको छ।

बोर्डले न्यूनतम ५ करोड रुपैयाँभन्दा बढी व्यापार गरेका चलचित्रका निर्मातालाई यो सम्मान प्रदान गर्न लागेको हो।यो सम्मान कार्यक्रम असार १६, २०८२ मा आयोजना हुने बोर्डले जनाएको छ।

सम्मानका लागि इच्छुक चलचित्र निर्माण कम्पनी वा वितरकले यो सूचना प्रकाशित भएको मितिले ७ दिनभित्र आवश्यक प्रमाणसहितका कागजात बोर्डमा पेश गर्नुपर्नेछ। आवश्यक कागजातमा चलचित्रको व्यापार प्रमाणित गर्ने बक्स अफिस प्रतिवेदन, वितरकको विवरण, र अन्य सम्बन्धित कागजातहरू समावेश हुनुपर्ने बोर्डले उल्लेख गरेको छ।

चलचित्र विकास बोर्डका अनुसार, यो सम्मानले नेपाली चलचित्र क्षेत्रमा व्यक्तिगत लगानीमार्फत योगदान पुर्‍याउने निर्माताहरूलाई प्रोत्साहन गर्ने र उद्योगको विकासमा थप हौसला प्रदान गर्ने अपेक्षा गरिएको छ। बोर्डले सन् २०१८ देखि काठमाडौं उपत्यकाभित्र र त्यसपछि अन्य क्षेत्रमा डिजिटल बक्स अफिस प्रणाली लागू गरेको छ, जसले चलचित्रको व्यापारलाई पारदर्शी रूपमा ट्र्याक गर्न सहयोग गरेको छ।

यो वर्षको तथ्याङ्कअनुसार, २०८१ मा प्रदर्शन भएका ६० स्वदेशी चलचित्रहरूमध्ये ‘पूर्णबहादुरको सारङ्गी’, ‘१२ गाउँ’, ‘छक्कापञ्जा ५’, र ‘बोक्सीको घर’ ले १० करोडभन्दा बढी व्यापार गर्न सफल भएका छन्।

यस्ता सफल चलचित्रहरूले नेपाली चलचित्र उद्योगको व्यावसायिक सम्भावनालाई उजागर गरेको छ।सम्मान कार्यक्रमले नेपाली चलचित्र उद्योगको गौरवमय इतिहासलाई स्मरण गर्दै नयाँ पुस्ताका निर्माताहरूलाई प्रेरणा प्रदान गर्ने विश्वास बोर्डले व्यक्त गरेको छ।

थप जानकारीका लागि चलचित्र विकास बोर्डको कार्यालयमा सम्पर्क गर्न वा बोर्डको आधिकारिक वेबसाइटमा सूचना हेर्न अनुरोध गरिएको छ।

फिल्मी फण्डा २०८२ आषाढ ३,मंगलवार ०४ : ४१ AM

3.3k Shares