फिल्मी फण्डा। चैत्र २९ देखि प्रदर्शनको  तयारीमा रहेको फिल्म पिताम्बर  गीत ‘म त फ्यान भए यार’ अहिले युट्युब ट्रेन्डिङमा छ। सार्वजनिक भएको ७ घण्टामा १२ लाखभन्दा बढी भ्यू प्राप्त गरेको यो गीतले ठूलो चर्चा पाएको छ।

आशिष अविरल र अस्मिता अधिकारीको आवाजमा रहेको यो गीतलाई आनन्द अधिकारीले लेखेका छन्, र आशिष अविरलले संगीत दिएका छन्। गीतको छायांकन तराईको आकर्षक लोकेसनमा गरिएको छ, जहाँ प्रदीप खड्का र दिव्या रायमाझीको जोडीलाई कोरियोग्राफर कविराज गहतराजले सुन्दर तरिकाले प्रस्तुत गरेका छन्। प्रदीपलाई यस गीतमा कोरससँग नृत्य गर्दै देख्न पाइएको छ, जुन उनलाई पहिलेका फिल्महरूमा कम मात्रामा देख्न पाइन्थ्यो।

निर्माता विशाल चौलागाईंका अनुसार, गीतको लागि भारतबाट सेट र कामदार ल्याइएको थियो, र स्थानीय ६ हजार मानिसहरूको उपस्थितिमा यो गीत तयार पारिएको छ।

पिताम्बर फिल्मका मुख्य कलाकार प्रदीप खड्का, दयाहाङ राई, सौगात मल्ल, आर्यन सिग्देल, अनुपविक्रम शाही लगायतका कलाकारहरूको अभिनय देख्न पाइनेछ। फिल्मले निर्देशनमा कृषा चौलागाईंको नयाँ प्रयास प्रस्तुत गर्ने छ।

फिल्मको प्रदर्शन चैत्र २९ गतेबाट हुनेछ, र यसलाई आरआर फिल्मस वितरण गर्दैछ।

फिल्मी फण्डा २०८१ माघ ३०,बुधवार १२ : ०३ PM

2.6k Shares