फिल्मी फण्डा। नेपालीहरूको मौलिक चाडपर्व र गीतसङ्गीतबीच गहिरो सम्बन्ध रहँदै आएको छ। तीज होस् वा दसैँ, अथवा तिहार नै किन नहोस्, हरेक चाडपर्वलाई लक्षित गर्दै नयाँनयाँ गीत सार्वजनिक हुने गरेका छन्। यी गीतहरूले मनोरञ्जन मात्रै दिँदैनन्, हाम्रा संस्कृति, परम्परा र चाडपर्वका विशेषतालाई समेत उजागर गर्ने गर्छन्।

यसै क्रममा नेपालीहरूको दोस्रो ठूलो पर्व तिहारलाई लक्षित गर्दै नयाँ गीत सार्वजनिक भएको छ। ‘सप्तरङ्गी टीकासँगै’ शीर्षकको उक्त गीतमा गायक विश्व नेपालीको एकल स्वर रहेको छ।

तिहार भन्नासाथ झिलिमिली बत्ती, फूलमाला, देउसीभैलो अनि दाजुभाइ र दिदीबहिनीबीचको आत्मीय सम्बन्ध सम्झनामा आउँछ। विशेषगरी भाइटीकाले बोकेको पारिवारिक स्नेह र सांस्कृतिक महत्त्वलाई गीतको शीर्षकले पनि झल्काएको छ।

यस गीतकी रचनाकार तथा निर्माता कौशिला खनाल कर्माचार्य हुन्। कौशिला नेपाली गीतसङ्गीत र सांस्कृतिक सिर्जनामा सक्रिय रहँदै आएकी एक बहुआयामिक व्यक्तित्व हुन्। गीतको लेखन र निर्माणसँगै उनी यसै गीतको म्युजिक भिडियोमा कलाकारका रूपमा समेत प्रस्तुत भएकी छिन्।

म्युजिक भिडियोमा उनको जोडी बनेका छन् नेपाली सिनेमाका चिरपरिचित अभिनेता दिलीप रायमाझी। युवराज वाइबाको निर्देशनमा तयार भएको म्युजिक भिडियोको छायाङ्कन गगल्फेदी रिसोर्टमा गरिएको हो। भिडियोमा रामकुमार केसीको छायाङ्कन, विकास दाहालको सम्पादन तथा लोमुस पौड्यालको निर्माण व्यवस्थापन रहेको छ।

‘सप्तरङ्गी टीकासँगै’ गीत IKM Art and Entertainment को आधिकारिक युट्युब च्यानलमार्फत सार्वजनिक गरिएको हो।

गीतकी सर्जक कौशिलाको व्यक्तिगत जीवनयात्रा पनि उत्तिकै रोचक छ। भुटानमा जन्मिएकी कौशिला सन् २००८ मा संयुक्त राज्य अमेरिका पुगेकी थिइन्। अमेरिकालाई आफ्नो कर्मभूमि बनाएकी उनले विदेशमा रहेर पनि नेपाली भाषा, गीतसङ्गीत र सांस्कृतिक सिर्जनालाई निरन्तरता दिँदै आएकी छिन्।

गीतकार, निर्माता तथा कलाकारका अतिरिक्त उनी एक सफल व्यवसायी र समाजसेवीका रूपमा समेत परिचित छिन्। सार्वजनिक प्रशासनमा स्नातकोत्तर गरेकी कौशिला तेक्वान्दोकी पाँचौँ डान ब्ल्याक बेल्ट मास्टर तथा अन्तर्राष्ट्रिय तेक्वान्दो रेफ्रीसमेत हुन्।

यसरी शिक्षा, खेलकुद, व्यवसाय र सामाजिक सेवासँगै गीतसङ्गीतमा पनि सक्रिय रहेकी कौशिलाले ‘सप्तरङ्गी टीकासँगै’ मार्फत आफ्नो सांगीतिक यात्रामा अर्को सिर्जना थपेकी छिन्।

पछिल्लो समय विदेशमा बसोबास गर्ने नेपालीभाषी स्रष्टाहरूले पनि नेपाली गीतसङ्गीतको सिर्जना र प्रवर्द्धनमा उल्लेखनीय सक्रियता देखाउँदै आएका छन्। कौशिलाको यो प्रयासलाई पनि त्यही सिलसिलाको एउटा निरन्तरताका रूपमा लिन सकिन्छ।

आखिर भूगोलले मानिसलाई जन्मभूमिबाट टाढा पुर्‍याउन सक्छ, तर आफ्नो भाषा, संस्कृति र परम्पराप्रतिको लगावलाई सजिलै टाढा बनाउन सक्दैन।

यही सांस्कृतिक लगावलाई गीतमा उतार्ने प्रयास गरेकी छिन् कौशिला खनाल कर्माचार्यले, तिहार विशेष नयाँ सिर्जना ‘सप्तरङ्गी टीकासँगै’ मार्फत। अब यो गीतले दर्शक तथा श्रोताको मन कत्तिको जित्छ, त्यो भने आगामी दिनमा थाहा हुनेछ।

फिल्मी फण्डा २०८३ कार्तिक २२,शनिवार १० : ११ PM

171 Shares