फिल्मी फण्डा । काठमाडौं महानगरपालिकाका मेयर र चर्चित र्यापर बालेन शाहले फिल्म लाज शरणम्मा आफ्नो पार्श्व गायनको यात्रा शुरू गरेका छन्। उनले फिल्मका लागि शब्द, संगीत र स्वर दिएको हिपहप गीत रेकर्ड गरिसकेका छन्।

फिल्म निर्माता कम्पनी जेपीटी क्रिएसनका प्रमुख अर्जुन घिमिरेका अनुसार, "बालेनजीले गीतको रेकर्ड गरिसक्नुभएको छ।" उनले भने, "अर्का गायक मिस्टर डीले गीतको बाँकी काम सम्हालिरहेका छन्।"

यो गीत हालै रेकर्ड भएको हो र फिल्म रिलिजको पूर्वमा सार्वजनिक गर्ने तयारी छ। लाज शरणम् फिल्म १४ फागुनमा प्रदर्शनमा आउने छ।

स्रोतका अनुसार, बालेनसँग अझै २० भन्दा बढी गीतको भिडियो बन्न बाँकी छन्। तीमध्ये एक गीतलाई चयन गरेर लाज शरणम्को लागि रेकर्ड गरिएको हो।

"हामीले नेपाली समाज र संस्कृति झल्काउने, मन छुने कथामा फिल्म बनाएका हौं। बालेनजी यो थाहा पाएर खुशी हुँदै गीत रेकर्ड गर्न तयार भएका छन्," घिमिरेले अनलाइनखबरसँग भने।

बालेन शाहका चर्चित गीतहरूमा बलिदान, स्याभेज, मार्फाको मदिरा, स्टे ट्रु, गोर्खाली तोप र यथार्थ पर्छन्। स्पोटीफाइको पछिल्लो तथ्यांकअनुसार, बालेनका गीतहरू मासिक १५,७०० पटक सुन्ने गरिन्छ।

फिल्मी फण्डा २०८१ पौष १९,शुक्रवार ०९ : ५२ AM

4.9k Shares