दयाहाङ र मिरुनाको जोडि फेरि पर्दामा, फिल्म 'रातो घेरा' निर्माण घोषणा

फिल्मी फण्डा । अभिनेता दयाहाङ राई र अभिनेत्री मिरुना मगर फेरि एकपटक फिल्ममा एकसाथ देखिने भएका छन् । पछिल्लो समय सुपरहिट फिल्म “जारी” मार्फत अत्यधिक दर्शकको मन जित्न सफल यो चर्चित जोडी अब नयाँ फिल्म “रातो घेरा (द रेड सर्कल)” मा पुनः पर्दामा देखिन लागेका हुन् । फिल्म रातो घेरालाई जीवन गुरुङ, कविता गुरुङ,भोजेन्द्र गुरुङ (भोज) र सरुन शेरचनले संयुक्त रुपमा निर्माण गर्न लागेका हुन्।

विश्राम फिल्मस् प्रा. लि.को निर्माणमा बन्न लागेको यो फिल्मलाई निर्देशक अनिल बुढा मगरले निर्देशन गर्ने भएका छन् । निर्माण टिमका अनुसार फिल्मको कथा सामाजिक र भावनात्मक पक्षमा आधारित हुने बताइएको छ, जसले दर्शकलाई मनोरञ्जनसँगै गहिरो सन्देश पनि दिने अपेक्षा गरिएको छ ।

दयाहाङ र मिरुनाको यो जोडी पछिल्लो समय नेपाली फिल्म क्षेत्रमा सबैभन्दा बढी रुचाइएका र सर्वाधिक चर्चित अन–स्क्रिन जोडीमध्ये एकका रूपमा स्थापित भइसकेको छ । “जारी” मा उनीहरूको दमदार अभिनय, प्राकृतिक प्रस्तुति र उत्कृष्ट केमेस्ट्रीले बक्स अफिसमा ठूलो सफलता हासिल गर्नुका साथै दर्शक तथा समीक्षक दुवैबाट अत्यन्त सकारात्मक प्रतिक्रिया प्राप्त गरेको थियो । यही सफलताको कारणले गर्दा यो जोडी पुनः एकसाथ देखिन लागेको खबर सार्वजनिक भएसँगै फिल्म “रातो घेरा” प्रति दर्शकमाझ प्रतिक्षित बनेको छ । फिल्म ‘ऊनको स्वीटर’ बाट अभिनेत्री मिरुना मगरले केही दिनअघि मात्रै नेपाल सरकारद्वारा प्रदान गरिने राष्ट्रिय चलचित्र पुरस्कारअन्तर्गत सर्वोत्कृष्ट अभिनेत्रीको अवार्ड जितेकी छन्।

निर्माण पक्षका अनुसार यो फिल्मलाई अझ भव्य, कथात्मक रूपमा सशक्त र प्राविधिक रूपमा उच्च स्तरको बनाउन विशेष ध्यान दिइएको छ । साथै अनुभवी कलाकार तथा प्राविधिक टिमको सहभागिताले फिल्मलाई थप प्रभावशाली बनाउने विश्वास गरिएको छ । साथै, फिल्ममा रहने अन्य कलाकार र प्राविधिक टिमको विवरण क्रमशः सार्वजनिक गरिने पनि जनाइएको छ ।

यो फिल्मलाई काफीया फिल्म्स प्रा. लि. का गोविन्द शाहीले वितरण जिम्मा लिएका छन् । “जारी” जस्तो सुपरहिट फिल्ममा देखिएको सफल जोडी पुनः एकसाथ पर्दामा देखिन लागेकाले “रातो घेरा” पनि यस वर्षको बहुप्रतिक्षित नेपाली फिल्ममध्ये एक बनेको छ । दर्शकहरूले यो जोडीबाट फेरि पनि उत्कृष्ट प्रदर्शन र नयाँ किसिमको सिनेम्याटिक अनुभवको अपेक्षा गरेका छन् ।

क्विक न्युज

दयाहाङ र मिरुनाको जोडि फेरि पर्दामा, फिल्म 'रातो घेरा' निर्माण घोषणा

दयाहाङ र मिरुनाको जोडि फेरि पर्दामा, फिल्म 'रातो घेरा' निर्माण घोषणा

सम्पादनमा १७ वर्षको यात्रा: नहकुल खड्कालाई राष्ट्रिय चलचित्र पुरस्कार–२०८२ को सर्वोत्कृष्ट अवार्ड

सुनिता डंगोलले गरिन् ‘टोल टोलमा फिल्म महोत्सव’को शुभारम्भ, काठमाडौंका चोक–चोकमा चलचित्र संस्कृति फैलाइने

मदनकृष्ण श्रेष्ठ चलचित्र दीर्घ साधना सम्मानबाट सम्मानित

‘ऊनको स्वीटर’को दबदबा, राष्ट्रिय चलचित्र पुरस्कारमा नीर शाहदेखि मदनकृष्णसम्म सम्मानित

१० लाख खर्चेर हेलिकप्टर चार्टर गरि ‘डिसेम्बर फल्स’को सुटिङ

बलिउड निर्देशक प्रकाश झाले गरे किम्फको शुभारम्भ

रघुनाथको ‘चिलगाडी’ उडाउँदै ‘मन्त्र’ निर्देशक गुरुङ

Filmyfanda

Quick Links

Our Team