फिल्मी फण्डा ।  नेपाली कला तथा चलचित्र क्षेत्रका वरिष्ठ कलाकार मदनकृष्ण श्रेष्ठ चलचित्र दीर्घ साधना सम्मान २०८२ बाट सम्मानित भएका छन्। शुक्रबार राष्ट्रपति कार्यालय शीतल निवासमा आयोजित राष्ट्रिय चलचित्र पुरस्कार तथा दीर्घ साधना सम्मान समारोहमा राष्ट्रपति रामचन्द्र पौडेलले उनलाई उक्त सम्मान प्रदान गरेका हुन्।

नेपाली रंगमञ्च, टेलिभिजन, चलचित्र तथा सामाजिक सचेतनामूलक प्रस्तुतिमार्फत दशकौँदेखि पुर्‍याएको योगदानको कदर गर्दै श्रेष्ठलाई यो सम्मान प्रदान गरिएको हो। सम्मानस्वरूप उनलाई ३ लाख ७५ हजार रुपैयाँ नगदसहित सम्मानपत्र प्रदान गरिएको थियो।

नेपाली मनोरञ्जन क्षेत्रमा मदनकृष्ण श्रेष्ठको योगदान अतुलनीय मानिन्छ। हास्यव्यंग्य, सामाजिक चेतना र सिर्जनात्मक प्रस्तुतिमार्फत उनले नेपाली कला क्षेत्रलाई विशिष्ट उचाइमा पुर्‍याएका छन्। विशेषगरी मदनकृष्ण–हरिवंशको जोडी नेपाली दर्शकमाझ अत्यन्त लोकप्रिय रहँदै आएको छ।

राष्ट्रिय चलचित्र पुरस्कार तथा दीर्घ साधना सम्मान समारोहमा चलचित्र क्षेत्रका विभिन्न विधामा उत्कृष्ट स्रष्टा तथा फिल्महरूलाई पनि सम्मान गरिएको थियो। यस वर्षको दीर्घ साधना सम्मान मदनकृष्ण श्रेष्ठलाई प्रदान गरिनु नेपाली चलचित्र तथा कला क्षेत्रप्रतिको उनको दीर्घकालीन योगदानको उच्च मूल्याङ्कनका रूपमा हेरिएको छ।

 तस्विर सहयोग : चन्द्र आले/अनलाईनखबर

फिल्मी फण्डा २०८३ आषाढ ६,शनिवार ०५ : २३ PM

171 Shares