फिल्मी फन्डा । रुपन्देहीको सिद्धार्थनगरस्थित भाटभटेनी सुपरस्टोरको पाँचौँ तलामा अत्याधुनिक सुविधा सम्पन्न आईएनआई सिनेमाज सञ्चालनमा आएको छ। शुक्रबारदेखि औपचारिक रूपमा सञ्चालनमा आएको यो मल्टिप्लेक्सले लुम्बिनी प्रदेशको मनोरञ्जन पूर्वाधारलाई सुदृढ बनाउनुका साथै नेपाली चलचित्रको घरेलु बजार विस्तारमा समेत महत्त्वपूर्ण योगदान पुर्‍याउने अपेक्षा गरिएको छ।

पछिल्ला वर्षहरूमा नेपाली चलचित्र उद्योगले नयाँ दर्शक खोज्ने र घरेलु बजारलाई थप फराकिलो बनाउने प्रयास गरिरहेका बेला देशका विभिन्न सहरमा आधुनिक सिनेमा हलहरूको विस्तारलाई सकारात्मक रूपमा हेरिएको छ। भैरहवामा थपिएको नयाँ मल्टिप्लेक्सले चलचित्र प्रदर्शनका लागि थप स्क्रिन उपलब्ध गराउँदै निर्माता, वितरक र प्रदर्शकलाई सहजता प्रदान गर्ने विश्वास गरिएको छ।

विशेषगरी राजधानीबाहिर आधुनिक चलचित्र हलहरूको संख्या बढ्दै जाँदा दर्शकले आफ्नै क्षेत्रमा गुणस्तरीय प्रविधिसहित चलचित्र हेर्न पाउने अवसर प्राप्त गरेका छन्। यसले नेपाली चलचित्रप्रतिको पहुँच बढाउनुका साथै नियमित दर्शक संस्कृतिको विकासमा समेत सहयोग पुग्ने अपेक्षा गरिएको छ।

आईएनआई सिनेमाजका संरक्षक तथा व्यवसायी दीपक कुँवरले भैरहवाको बढ्दो व्यापारिक तथा पर्यटन सम्भावनालाई मध्यनजर गर्दै लगानी गरिएको बताउनुभयो। निर्देशक आभाष कुँवरले आधुनिक मनोरञ्जन क्षेत्रको विकाससँगै युवाहरूलाई स्वदेशमै अवसर सिर्जना गर्न सकिन्छ भन्ने सन्देश दिन खोजिएको उल्लेख गर्नुभयो।

आईएनआई सिनेमाज सञ्चालक सुरेन्द्र थापाका अनुसार यो प्रविधिले दर्शकलाई अन्तर्राष्ट्रिय स्तरको चलचित्र अनुभव प्रदान गर्नेछ। सुरक्षा व्यवस्थालाई समेत प्राथमिकता दिँदै आगलागी प्रतिरोधी सामग्री, आकस्मिक बहिर्गमन मार्ग तथा अन्य आवश्यक सुरक्षा पूर्वाधारको व्यवस्था गरिएको छ।

मल्टिप्लेक्समा दुईवटा अडिटोरियम रहेका छन्। प्रत्येक हलमा १९८ सिट क्षमता रहेको छ भने कुल ३९६ दर्शकले एकैपटक चलचित्र हेर्न सक्ने व्यवस्था गरिएको छ। यहाँ बेल्जियममा निर्मित बार्को लेजर प्रोजेक्टर, १६ च्यानल डीटीएस–एक्स इमर्सिभ साउण्ड सिस्टम तथा आधुनिक सिटिङ सुविधाको प्रयोग गरिएको छ।

सन् २०१९ मा स्थापना भएको आईएनआई सिनेमाजले काठमाडौं, बुटवल, सिमरा र नवलपुरलगायत विभिन्न स्थानमा सेवा विस्तार गरिसकेको छ। भैरहवा शाखासहित कम्पनीको कुल स्क्रिन संख्या १३ पुगेको छ।

चलचित्र क्षेत्रका सरोकारवालाहरूका अनुसार देशभर आधुनिक सिनेमा हलहरूको विस्तार हुनु नेपाली चलचित्र उद्योगका लागि सुखद पक्ष हो। यसले चलचित्रको प्रदर्शन क्षमता बढाउने, नयाँ दर्शक जोड्ने तथा समग्र चलचित्र बजारलाई चलायमान बनाउन मद्दत गर्ने विश्वास गरिएको छ। भैरहवामा सञ्चालनमा आएको आईएनआई सिनेमाजले पनि यही उद्देश्यलाई थप बल पुर्‍याउने अपेक्षा गरिएको छ।

फिल्मी फण्डा २०८३ जेठ २६,मंगलवार ०८ : ५० AM

339 Shares