फिल्मी फण्डा। जौन योञ्जनद्वारा निर्देशित नेपाली फिल्म ‘क्रलिङ क्रोज: आँखा’ले संयुक्त राज्य अमेरिकामा आयोजना भएको WorldFest-Houston International Film Festival मा दुई प्रतिष्ठित ‘रेमी अवार्ड’ जित्दै ऐतिहासिक सफलता हात पारेको छ। हालै आयोजक कमिटीले इमेलमार्फत फिल्मले दुई विधामा अवार्ड जितेको आधिकारिक जानकारी गराएको हो।

यस फिल्मले ‘Foreign Features’ विधामा उत्कृष्ट हुँदै ‘Platinum Remi Award’ र ‘Directing – Craft Category’ विधामा ‘Gold Award’ जितेको छ।

विश्वभरका फिल्म निर्माता र सिर्जनाहरूलाई एकै ठाउँमा ल्याउने यो महोत्सव अमेरिकाको Houston मा आयोजना भएको हो। सन् १९६१ मा स्थापना भएको यो महोत्सव विश्वकै सबैभन्दा पुरानो स्वतन्त्र फिल्म महोत्सवमध्ये एक मानिन्छ।

Steven Spielberg, George Lucas, David Lynch र Ang Lee जस्ता दिग्गज हलिउड निर्देशकहरूले पनि आफ्नो करियरको सुरुवातमा यही महोत्सवबाट रेमी अवार्ड प्राप्त गरेका थिए। यस्तो विश्वप्रसिद्ध मञ्चमा नेपाली फिल्म र यसका निर्देशकले ‘Platinum’ र ‘Gold’ जस्ता सर्वोच्च अवार्ड जित्नुले नेपाली फिल्मलाई सम्मानित विश्वव्यापी प्लेटफर्ममा अब्बल साबित गरेको छ।

यसअघि यस फिल्मले Asia Pacific Film Festival मा ‘उत्कृष्ट फिल्म’को उपाधि जितेर इतिहास रचिसकेको छ। उक्त महोत्सवको सर्वोच्च सम्मान प्राप्त गर्ने यो नै पहिलो नेपाली फिल्म हो। एसियामा ऐतिहासिक जित र अमेरिकामा प्रतिष्ठित दुई रेमी अवार्ड प्राप्तिसँगै ‘आँखा’ले नेपालको उदाउँदो फिल्म उद्योगतर्फ विश्वको ध्यान गम्भीर रूपमा आकर्षित गर्न सफल भएको छ।

निर्देशक जौन योञ्जनले प्राप्त गरिरहेको यस अन्तर्राष्ट्रिय मान्यताले ‘नेपाली कथाहरूले विश्वव्यापी दर्शकहरूको मन छुन सक्छन्’ भन्ने कुरा स्पष्ट रूपमा प्रमाणित गरेको छ। फिल्म समीक्षकहरूका अनुसार यो सफलताले नेपाली फिल्म निर्माणको प्राविधिक तथा कथा वाचनको बढ्दो शक्ति र राष्ट्रिय सीमाभन्दा बाहिरका दर्शकहरूसम्म पुग्न सक्ने क्षमतालाई उजागर गरेको छ।

सुकुम्बासी बस्तीमा जीवनयापन गरिरहेका सामान्य मानिसहरूको कथा, सङ्घर्ष र यथार्थलाई गहिरो र मार्मिक रूपमा चित्रण गरेको यस फिल्ममा स्मिता लामिछाने, पशुपति राई, निशा अधिकारी, आरके मेहता, विजय बराल, बुद्धि तामाङ लगायतका कलाकारहरूको जीवन्त अभिनय रहेको छ।

यो जितसँगै ‘क्रलिङ क्रोज: आँखा’ले नेपाली फिल्म क्षेत्रको शिर अन्तर्राष्ट्रिय स्तरमा थप उच्च बनाएको छ।