फिल्मी फण्डा। पछिल्लो समय फिल्म ‘बोक्सीको घर’मार्फत बक्स अफिसमा उल्लेखनीय सफलता हात पारेकी अभिनेत्री तथा निर्मात्री केकी अधिकारीले आफ्नो नयाँ फिल्म ‘स्टेशन’को निर्माण कार्य औपचारिक रूपमा सुरु गरेकी छिन् ।

सोमबार अक्षय तृतीयाको अवसर पारेर ललितपुरस्थित बंगलामुखी मन्दिर परिसरमा फिल्मको शुभमुहूर्त गरिएको हो । मुहूर्त कार्यक्रममा निर्देशक, निर्माता तथा प्राविधिक टोलीको उपस्थिति रहेको थियो ।

केकीले नयाँ वर्षको अवसर पारेर यस फिल्मको निर्माण घोषणा गरेकी थिइन् । निर्माण घोषणासँगै सार्वजनिक गरिएको थिम पोस्टरले फिल्मको विषयवस्तुप्रति दर्शकमाझ कौतुहलता जगाएको छ । पोस्टरमा पुरानो काठको दराजभित्र राखिएका केही रहस्यमय सामग्री देखाइएको छ, जसले फिल्म सोसल ड्रामामा आधारित रहने संकेत गर्छ ।

२०८१ सालको सफल फिल्म ‘बोक्सीको घर’पछि केकीले सोही टिमसँगको सहकार्यलाई ‘स्टेशन’मा पनि निरन्तरता दिएकी छन् ।

केकी अधिकारी फिल्मसको ब्यानरमा निर्माण हुने यस फिल्मलाई सुलक्षण भारतीले निर्देशन गर्नेछन् । फिल्मको कथा पनि भारतीकै रहेको छ भने निर्माता बद्री अधिकारी रहेका छन् ।

फिल्मको शुभमुहूर्त गरिए पनि यसमा अभिनय गर्ने कलाकारहरूको नाम भने अझै सार्वजनिक गरिएको छैन । निर्माण टिमले मुख्य कलाकारबारे गोप्य राख्दै दर्शकमाझ उत्सुकता कायम राखेको छ ।

केकी स्वयं फिल्ममा अभिनय गर्नेछिन् वा निर्मात्रीको रूपमा मात्र रहनेछिन् भन्ने विषय पनि प्रस्ट भइसकेको छैन ।

तेस्रो सातादेखि छायांकन सुरु गर्ने तयारी रहेको यो फिल्म आगामी भदौ १९ गते देशभर प्रदर्शनमा आउने निर्माण पक्षले जनाएको छ ।

‘बोक्सीको घर’जस्तो सामाजिक र गम्भीर विषयवस्तुलाई दर्शकले मन पराएकाले ‘स्टेशन’लाई पनि प्रतिक्षित फिल्मको रूपमा हेरिएको छ ।