नेपाली मेकअप आर्टिस्ट तथा सौन्दर्य व्यवसायी लेमी तामाङले १३ वर्षभन्दा लामो अनुभवसहित विश्वकै प्रतिष्ठित फेसन मञ्चमध्ये एक पेरिस फेसन विकमा आफ्नो उपस्थिति जनाएकी छन्। ब्याकस्टेज मेकअप आर्टिस्टका रूपमा काम गरिरहेकी लेमीले अन्तर्राष्ट्रिय फेसन तथा सौन्दर्य उद्योगमा नेपाली प्रतिभाको पहिचान विस्तार गरिरहेकी छन्।

लेमीको व्यावसायिक यात्रा नेपालबाटै सुरु भएको हो। सानै उमेरदेखि कला र मेकअपमा रुचि राख्ने उनले फाइन आर्ट्सको पृष्ठभूमिसहित आफ्नो करियर अघि बढाएकी थिइन्। त्यसपछि उनी मुम्बई पुगिन्, जहाँ केही वर्ष सौन्दर्य तथा फेसन उद्योगमा काम गरिन्। उनको व्यावसायिक यात्राले पछि दुबई, मिलान र न्यूयोर्कसम्म पुर्‍यायो। यी सहरमा उनले फेसन शो, एडिटोरियल, कमर्सियल प्रोजेक्ट, प्रोडक्सन तथा विभिन्न सौन्दर्य अभियानमा काम गर्ने अवसर पाइन्।

एक दशकभन्दा लामो अनुभव हासिल गरेपछि लेमीको यात्रा अहिले पेरिस फेसन विकसम्म पुगेको छ। त्यहाँ ब्याकस्टेज मेकअप आर्टिस्टका रूपमा काम गर्नु उनको करियरको सुरुवातदेखि नै बोकेको सपना पूरा हुनु हो। अन्तर्राष्ट्रिय फेसन उद्योगका क्रिएटिभ टिम, मोडल, डिजाइनर तथा प्रोडक्सन टिमसँग काम गर्ने अवसरलाई उनले आफ्नो व्यावसायिक यात्राको महत्त्वपूर्ण उपलब्धिका रूपमा लिएकी छन्।

मेकअप आर्टिस्टका रूपमा अन्तर्राष्ट्रिय करियर निर्माणसँगै लेमीले आफ्नै सौन्दर्य व्यवसायसमेत विस्तार गरेकी छन्। उनले सन् २०२१ मा ‘Pastel Beauty’ स्थापना गरिन्। नेपाली बजारमा उच्च गुणस्तरका मेकअप उत्पादन सहज रूपमा उपलब्ध गराउने उद्देश्यले सुरु गरिएको यो नेपाली ब्यूटी ब्रान्डले पछिल्लो समय आफ्नो उत्पादन दायरा विस्तार गर्दै आएको छ।

Pastel Beauty का उत्पादन दक्षिण कोरियाको एक ठूलो तथा अन्तर्राष्ट्रिय रूपमा परिचित सौन्दर्य उत्पादन केन्द्रमा निर्माण हुँदै आएका छन्। उक्त केन्द्रमा विभिन्न विश्वव्यापी ब्यूटी ब्रान्डका उत्पादनसमेत निर्माण हुने बताइएको छ। ब्रान्डले हाल कम्प्लेक्सन प्रोडक्ट, विभिन्न मेकअप सामग्री तथा व्यावसायिक मेकअप ब्रस उपलब्ध गराउँदै आएको छ। थप उत्पादन पनि विकासको क्रममा छन्।

त्यसपछि सन् २०२५ मा लेमीले ‘Bisou Beauty’ नामक अर्को ब्यूटी ब्रान्ड सुरु गरिन्। Pastel Beauty भन्दा युवा पुस्तालाई लक्षित, रमाइलो र आत्मअभिव्यक्तिलाई प्राथमिकता दिने अवधारणामा आधारित Bisou Beauty ले किफायती मूल्यमा लिपस्टिकलगायत विभिन्न मेकअप सामग्री उपलब्ध गराउँदै आएको छ। ब्रान्डले आगामी दिनमा थप उत्पादन सार्वजनिक गर्ने तयारीसमेत गरिरहेको छ।

नेपालबाट सुरु भएको लेमीको यात्रा मुम्बई, दुबई, मिलान र न्यूयोर्क हुँदै पेरिस फेसन विकको ब्याकस्टेजसम्म पुगेको छ। यस अवधिमा उनले अन्तर्राष्ट्रिय फेसन उद्योगमा आफ्नो अनुभव विस्तार गर्नुका साथै आफ्नै दुईवटा सौन्दर्य ब्रान्डसमेत स्थापना गरेकी छन्।

लेमी तामाङको यात्रा निरन्तरता, मेहनत र महत्वाकांक्षाको उदाहरण हो। पेरिस फेसन विकमा उनको सहभागिता व्यक्तिगत करियरको महत्त्वपूर्ण उपलब्धि मात्र नभई अन्तर्राष्ट्रिय फेसन तथा सौन्दर्य उद्योगमा नेपाली प्रतिभाको उपस्थिति विस्तार हुँदै गएको संकेतका रूपमा पनि हेरिएको छ।

फिल्मी फण्डा २०८३ आश्विन २३,शुक्रवार १२ : २८ PM

115 Shares